Fundargerð aðalfundar Hollvinasamtaka Þórðar Halldórssonar frá Dagverðará  fyrir 2011 og 2012.

Laugardaginn 25. maí 2013 var haldinn aðalfundur Hollvinasamtaka Þórðar Halldórssonar frá Dagverðar á í Eldfjallasafninu í Stykkishólmi.

Fundur hófst kl. 17 með setningu formanns, Reynis Ingibjartssonar. Gerði hann uppástungu um fundarstjóra, Hauk Þórðarson og í fjarveru ritara, Ólínu Gunnlaugsdóttur var stungið upp á formanni sem fundarritara. Þessar uppástungur voru samþykktar.

Formaður flutti síðan skýrslu stjórnar, sem var með stysta móti að þessu sinni. Ekki var haldinn aðalfundur á árinu 2012. Á undan aðalfundinum var forsýning á heimildarmynd Kára Schram um Þórð í Eldfjallasafninu. Þakkaði Reynir Kára þolinmæðina við gerð myndarinnar sem senn verður fullbúin til frumsýningar. Í myndinni birtist Þórður ljóslifandi og stöðugt voru að bætast við myndbrot sem gera þessa mynd að ómetanlegri heimild um einstakan mann. Nú er bara eftir að ljúka við endanlega gerð og fjármögnun myndarinnar.

Þessu næst kynnti gjaldkeri, Ragnheiður Víglundsdóttir, reikninga fyrir starfsárin 2011 og 2012. Eigið fé í árslok 2012 var kr. 366.221 og í sjóði voru kr. 291.221. Þá kom fram að greiddar hafa verið kr. 1.750.000 við gerð heimildarmyndarinnar. Ekki voru innheimt félagsgjöld á árunum 2011 og 2012.

Reikningarnir voru síðan samþykktir samhljóða.

Fráfarandi stjórn var endurkjörin en hún er þannig skipuð að Reynir Ingibjartsson er formaður, Ólína Gunnlaugsdóttir ritari og Ragnheiður Víglundsdóttir gjaldkeri. Meðstjórnendur eru: Haukur Þórðarson og Sæmundur Kristjánsson. Í varastjórn: Stefán Jóhann Sigurðsson og Svala Þyrí Steingrímsdóttir. Þá voru þeir: Skúli Alexandersson og Jón Svavar Þórðarson endurkjörnir skoðunarmenn reikninga.

Þá var rætt um félagsgjald fyrir árið 2013. Var samþykkt að það verði kr. 2000.- eða sama upphæð og áður var.

Undir liðnum önnur mál gerði Kári Schram grein fyrir vinnu við gerð heimildarmyndarinnar og ákveðið er að frumsýna myndina í nóvember n.k. Hugsanlega verður hún áður sýnd á kvikmyndahátíðinni Skjaldborg á Patreksfirði.

Vinnan framundan er fyrst og fremst við að bæta hljóðgæði og texta. Fyrst verður myndin sýnd í Bíó Paradís í Reykjavík og væntanlega á helstu þéttbýlisstöðum á Snæfellsnesi. Þá vonast Kári til að myndin fari á kvikmyndahátíðir erlendis og svo verður hún sýnd í sjónvarpinu næsta vetur – kannski um jólin.

Kári var spurður hvað vantaði af peningum til að klára myndina og nefndi Kári um eina og hálfa milljón. Umræðurnar snérust síðan um að afla þess fjár. Loforð eru fyrirliggjandi hjá nokkrum aðilum og svo þarf að ræða við fleiri. Sérstaklega var bent á Lista og menningarnefnd Snæfellsbæjar , Markaðsstofu Vesturlands og Þróunarfélag Snæfellsness. Var samþykkt að Reynir og Kári færu yfir þessa kosti hið fyrsta og bréf síðan sent á viðkomandi aðila sem yrði fylgt eftir með viðtölum. Nú ætti að vera auðveldara að afla fjár þar sem myndin væri næstum fullbúin.

Þá var rætt um að gera myndband af myndinni sem styrktaraðilar fengu síðan í hendur.

Fundarmenn lýstu mikilli ánægju með forsýningu myndarinnar og það var spenningur í loftinu.

Loks var rætt um kynningu á hollvinasamtökunum og tengsl við félagsmenn. Póstlistinn lenti í hremmingum og buðust fundarmenn til að koma honum í lag. Þá eru samtökin komin með facebooksíðu. Fundarstjóri sleit síðan fundi og óskaði fundarmönnum góðrar heimferðar.

Alls sátu þennan aðalfund 14 manns og Eldfjallasafninu voru færðar þakkir fyrir aðstöðuna.

Reynir Ingibjartsson, fundarritari.

13.11.2011

Aðalfundur samtakana var haldin á afmælisdegi Þórðar 25.11.2011.

Hér er fundargerðin.

Fundargerð aðalfundar Hollvinasamtaka Þórðar Halldórssonar frá Dagverðará.

Föstudaginn 25. nóvember 2011 var haldinn aðalfundur Hollvinasamtaka Þórðar Halldórssonar frá Dagverðará í Lýsuhólsskóla í Staðarsveit.

Fundur hófst kl. 15.30 með setningu formanns, Reynis Ingibjartssonar. Gerði hann uppástungu um fundarstjóra, Hauk Þórðarson og í fjarveru ritara, Ólínu Gunnlaugsdóttur var stungið upp á formanni sem fundarritara. Þessar uppástungur voru samþykktar.

Formaður flutti skýrslu stjórnar sem var með stysta móti að þessu sinni. Hann minntist þess fyrst að aðalfundurinn væri haldinn á fæðingardegi Þórðar, 25. nóvember 1905.

Aðalverkefni starfsársins var að fylgja eftir gerð heimildarmyndarinnar um Þórð, sem Kári Schram, kvikmyndagerðarmaður hefur unnið að undanfarin ár. Hefur formaður átt nokkra fundi með Kára og nú hillir undir að verkið sé að klárast. Kári var mættur á fundinn og var umræðum um myndina frestað þar til í lok fundarins, þegar sýndir voru hlutar úr myndinni.

Þessu næst kynnti gjaldkeri, Ragnheiður Víglundsdóttir, reikninga fyrir starfsárið 2010. Félagssgjöld sem innheimtust á árinu voru kr. 95.250.- og eigið fé í árslok kr. 717.126.-.

Í umræðum um starfsemina kom m.a. fram að bæta þyrfti tengslanet félagsmanna og heimasíða ein og sér þjónaði ekki lengur þeim tilgangi. Var formanni ásamt Hauki og Ólínu falið að opna facebooksíðu fyrir félagið og tengja hana við heimasíðuna.

Þá var rætt um nauðsyn þess að safna saman öllum þeim fjölda af sögum, sem lifa hjá fólki um Þórð og hann hefur ýmist sagt eða sagðar hafa verið af honum. Facebooksíða gæti hjálpað til við þá vinnu og það þyrfti jafnvel að auglýsa eftir sögumönnum og láta taka upp sögurnar og safna saman, hugsanlega í bók.

Reikningar voru síðan samþykktir samhljóða.

Fráfarandi stjórn var endurkjörin en hún er þannig skipuð að Reynir Ingibjartsson er formaður, Ólína Gunnlaugadóttir ritari, Ragnheiður Víglundsdóttir ritari. Meðstjórnendur eru: Haukur Þórðarson og Sæmundur Kristjánsson. Varastjórn var endurkjörin Stefán Jóhann í Ólafsvík og Svala Þyri Steingrímsdóttir í Hafnarfirði. Skoðunarmenn reikningar verða áfram Skúli Alexandersson á Hellisandi og Jón Svavar Þórðarson á Ölkeldu í Staðarsveit.

Þá var rætt um félagsgjald. Var ákveðið að innheimta það ekki fyrir árið 2011, en það verði óbreytt – kr. 2.000.- fyrir árið 2012.

Undir liðnum önnur mál voru sýndir kaflar úr væntanlegri heimildarmynd um Þórð. Kári hefur klippt saman efni úr miklu safni af myndefni og ýmsum upptökum, sem hann hefur aflað. Ljóst er að mikið vandaverk verður að velja úr öllu því efni, en fundarmenn lýstu ánægju sinni með það sem sýnt var og Kári fékk margar fyrirspurnir um myndina.

Kári stefnir að því að myndin verði tilbúin næsta vor og fyrst verði lögð áhersla á að sýna hana á ýmsum kvikmyndahátíðum áður en hún fer í almennari dreifingu.

Ekki var fleira undir önnur mál og fundarstjóri sleit fundi, en kaffi var í boði Lýsuhólsskóla.

Reynir Ingibjartsson, fundarritari.

1.06.2008

Nú er aðalfundi samtakana lokið og mættu um 20 meðlimir og áttu góðan fund. Fundargerðin er komin á vefinn og  ársskýrslan er hér.

Skýrsla formanns Hollvinasamtaka Þórðar Halldórssonar frá Dagverðará fyrir starfsárið frá 13. maí 2007 til 31. maí 2008, flutt á aðalfundi á Lýsuhóli.

Góðir fundarmenn.

Í framhaldi af síðasta aðalfundi, sem haldinn var hér á Lýsuhóli, 13. maí í fyrra, skipti nýkjörin stjórn með sér verkum þannig að Reynir Ingibjartsson var áfram formaður og Ólína Gunnlaugsdóttir ritari, en Ragnheiður Víglundsdóttir tók við gjaldkerastarfinu af Stefáni Jóhanni Sigurðssyni. Áfram sátu í aðalstjórn: Haukur Þórðarson og Sæmundur Kristjánsson og í varastjórn: Aðalheiður Hallgrímsdóttir og Stefán Jóhann Sigurðsson.

Stefán Jóhann hélt vel um sjóðinn og eru hér með ítrekaðar þakkir til hans fyrir alla alúðina.

Verkefni stjórnar á þessu starfstímabili var að stærstum hluta að standa fyrir ljósmyndasýningunni um Þórð í vitanum á Malarrifi, sem búið var að ákveða að halda sumarið 2007.  Það var einstaklega skemmtilegt verkefni. Fyrst var að afla styrkja og undirbúa sýningarskrá og upplýsingar um staðinn. Haft var fyrst samband við útibússtjóra Landsbankans í Ólafsvík og sótt um 150 þús. króna styrk. Eftir nokkra bið kom svarið úr höfuðstöðvunum – því miður. Ekki var þó gerist upp heldur haft samband við Gísla Kjartansson hjá Sparisjóði Mýrasýslu. Þar var beiðnin samþykkt upp á krónu og það tók ekki viku að klára málið. Við kunnum Sparisjóðnum bestu þakkir fyrir stuðninginn.

Nú var hægt að gera veglega sýningarskrá og tók undirritaður að sér að setja saman texta um Þórð og ljósmyndasýninguna og eins um Malarrif og umhverfi. Jón B. Guðlaugsson snaraði öllu svo á ensku og kom það sér vel á sýningartímanum. Ekki þurfti að ganga frá ljósmyndum, þar sem sýningin var frágengin á árinu 2005 og hægt að setja hana upp hvar sem er með engum fyrirvara.  Þau Haukur og Ólína sá um uppsetninguna í Malarrifsvita og naut hún sín sérlega vel í vitanum.  Þá fæddist sú góða hugmynd að bjóða myndlistarmanni að vera með í sýningunni í vitanum og sýndi, Ásdís Arnardóttir frá Brekkubæ, verk sín á einum pallinum í vitanum. Mæltist það afar vel fyrir.

Í   góðu samstarfi við Siglingastofnun og Þjóðgarðinn Snæfellsjökul, var ákveðið að hafa sýninguna opna um helgar frá 30. júní til 6. ágúst frá kl. 10 til 16 og tóku stjórnarmenn og félagsmenn í Hollvinasamtökunum að sér að vera á staðnum skiptis. Gekk það allt eins og í sögu.

Laugardaginn 30. júní var svo sýningin opnuð og gerði það sú ágæta listakona og fjölmiðlakona; Rósa Ingólfsdóttir með tilhrifum og veðrið lék við gesti. Eftirminnilegastur varð þó kannski söngurinn í vitanum, en ungur söngvari; Unnar Geir Unnarsson söng þar á efsta palli: ,,Brennið þið vitar” og kom hljómburðurinn sannarlega  á óvart.

Þessi opnun var öllum viðstöddum, eftirminnileg og umhverfi Malarrifs, skartaði sínu fegursta.

Sýningunni lauk svo á frídegi verslunarmanna og höfðu rúmlega 1300 manns skráð sig í gestabókina eða um 100 manns á hverjum degi sem opið var. Ætla má að gestir hafi verið a.m.k. 1500 því alltaf gleyma einhverjir að skrá sig. Margir erlendir ferðamenn komu í vitann og óhætt er að fullyrða að þeir jafnt og Íslendingarnir, áttu þarna eftirminnilega stund og harðfullorðið fólk lagði á sig allar tröppurnar og upp í útsýnisrýmið.

Í innganginum og vitanum var komið fyrir ýmsum munum sem tengdust Þórði svo og ljósritum af viðtölum við hann í blöðum og tímaritum. Þá voru vel þegin framlög í bauk í anddyrinu og þeir sem lögðu 1000 kr. í hann, fengu kortapakka af Snæfellsnesi að launum. Safnaðist drjúgt í baukinn og virkaði vel, að bjóða fólki að tæma í hann smámyntina, áður en haldið var upp tröppurnar.

Ég vil þakka öllum þeim sem lögðu hönd á plóg við ljósmyndasýninguna um Þórð Halldórsson frá Dagverðará á hans heimslóðum sumarið 2007 og vonandi á sýningin eftir að fara aftur upp á veggina í vitanum.

Góðvinur Þórðar, Jón B. Guðlaugsson hafði svo frumkvæði að því að ljósmyndasýningin var sett upp í Þjóðarbókhlöðunni í Reykjavík sl. haust. Var hún þar uppi í um 2 mánuði frá september til októberloka. .Á sama tíma var þar sýning um Jón Sveinsson (Nonna) og hlaut sú sýning mestu athyglina. Margir eiga leið um Þjóðarbókhlöðuna og ýmsir hafa eflaust gefið sér tíma til að líta við hjá þjóðsagnapersónunni undir Jökli.

Ýmsir sem komu á sýninguna í Malarrifsvita sl. sumar, lögðu einnig leið sína að Dagverðará á stað þeirra systkina, Þórðar og Helgu. Þá var farið að velta fyrir sér ástandi og framtíð gamla íbúðarhússins á Dagverðará, sem orðið hefur að hluta landslagsins í tímans rás.  Nú standa einungis berir steinveggirnir eftir og veður og vindar vinna sitt verk samviskusamlega.  Hjá ýmsum velunnurum staðarins, hafa kviknað þær hugmyndir að gera upp húsið og finna því viðeigandi hlutverk.  Málið kom inn á borð stjórnar Hollvinasamtakanna í ágúst sl. og var niðurstaðan, að Hauki Þórðarsyni, Reyni Ingibjartssyni og Skúla Alexanderssyni var falið að kanna stöðu mála hjá eigendum Dagverðarár, sem munu vera allt að fimmtán talsins. Ekkert hefur orðið úr fundum ennþá og dró það úr mönnum, að einn úr hópi eigenda Dagverðarár, Ólína Gunnlaugsdóttir, lenti í alvarlegu umferðaslysi á þessum tíma og má þakka fyrir að vera með okkur í dag. Kannski sannaðist að hún á jafn mörg líf og Þórður á sínum tíma. Ég get þó nefnt að ég orðaði húsið á Dagverðará við einn af áhugamönnunum um endurbyggingu hússins – Davíð Scheving Thorsteinsson, þann kunna athafnamann og hann benti mér á einstaklinga til að ræða málið frekar. Ekkert hefur þó orðið úr því og það býður næstu stjórnar að halda viðræðunefndinni við efnið.

Eitt af aðalmarkmiðum Hollvinasamtakanna er að vekja athygli á Lýsuhóli sem heilsulind og möguleikunum þar að nýta heita vatnið og ölkelduvatnið í þeim tilgangi. Fyrir nokkru var stofnuð Orkuveita Staðarsveitar og eiga Hollvinasamtökin þar lítinn hlut. Því miður hafa boranir á staðnum ekki skilað því sem vænst var – ennþá, en nú eru komnar fram athyglisverðar hugmyndir um baðlaug sem nýtir sér auðlindir staðarins. Verður fróðlegt að fylgjast með því máli og kannski á hún eftir að heita; Þórðarlaug, en Þórður hafði eins og kunnugt er – ódrepandi trú á mætti ölkelduvatnsins.

Þegar Hollvinasamtökin voru stofnuð árið 2005, var strax ákveðið að láta gera heimildarkvikmynd um Þórð og Kári G. Schram fenginn til þess verks. Nokkuð hefur það verk dregist eins og gengur með slík verkefni, en Kári á nú þegar mikið af efni sem búið er að taka upp og aðeins eftir að klára verkið. Vonandi verður því lokið á þessu ári og það verður mjög spennandi að sjá útkomuna, enda aðaleikarinn með þeim betri í faginu þó að aldrei færi hann í leikskóla nema þá skóla lífsins.

Hér hefur verið stiklað á því helsta sem á dagana hefur drifið á liðnu starfsári og allt hefur þetta verið indælt stríð. Formlegir stjórnarfundir voru tveir, en margvísleg samskipti utan þeirra. Ég þakka samstjórnarmönnum mínum fyrir ánægjulegt ár og kannski erum við rétt að byrja. Húsráðendum hér á Lýsuhóli þakka ég gott skjól fyrr og síðar.

Takk fyrir.

Reynir Ingibjartsson.

11.09.2007

26.06.2007

06.05.2007

Aðalfundur félagsins verður haldin í Félagsheimilinu að Lýsuhóli sunnudaginn 13. maí. kl. 14:00 

Venjuleg aðalfundarstörf

Stjórnin

20.05.2006

Sælir félagar.

Það er nú liðinn nokkur langur tími síðan hér hefur verið skrifað. En það er helst í fréttum að þann 13. maí var aðalfundur félagsins haldinn í félagsheimilinu að Lýsuhóli. Tuttugu og tveir félagar mættu og áttu góðan fund og enginn bilbugur á félagsmönnum að stefna á markmið félagsins á komandi árum. Þegar fundi lauk var farið í Hellnakirkjugarð og gröf Þórðar heimsótt og minning hans heiðruð. Þaðan var síðan haldið að Dagverðará til skyldmenna Þórðar sem buðu upp á veisluborð að hætti húsfreyja undir jökli. Viljum við færa þeim kærar þakkir fyrir veitingarnar.

Á myndinni eru fundarmenn aðalfundarins

28.11.2005

Þá er stóri dagurinn liðinn og fór vel fram. Málþingið mjög fræðandi og skemmtilegt enda topp fyrirlesarar á ferðinni. Kvöldið heppnaðist líka mjög vel og mæting heimamanna mjög góð, helst var að margra félagsmanna sem áttu langt að var saknað. Hér er frétt frá deginum eins eru komnar myndir frá deginum inn á myndasíðuna. Þórði barst bréf á afmælisdaginn og síðan Heilsulind orðinn virk.

Þann 25. nóvember sl. minntust vinir og sveitungar Þórðar Halldórssonar frá Dagverðará þess, að 100 ár voru liðin frá fæðingu hans. Þórður sem náði háum aldri, var um margt óvenjulegur maður - einstakur sagnamaður, málari og skáld, þjóðfræg refaskytta og veiðimaður, frumkvöðull í heilsurækt og margreyndur í ýmsum mannraunum.

Hann var sérstakur áhugamaður um heilsugildi ölkelduvatns, sem víða finnst á Snæfellsnesi og því þótti við hæfi á afmælisdaginn, að halda sérstakt málþing um ölkeldur og heilsulindir á Snæfellsnesi. Voru það Hollvinasamtök Þórðar, sem stofnuð voru 5. mars sl. sem stóðu að þessu málþingi, sem haldið var að Lýsuhóli í Staðarsveit í Snæfellsbæ.

Þau sem fluttu erindi á málþinginu voru: Guðmundur Ómar Friðleifsson jarðfræðingur, Jón Þorsteinsson gigtarlæknir, Guðmundur Björnsson endurhæfingarlæknir, Haukur Þórðarson kennari og Anna G. Sverrisdóttir framkvæmdastjóri Bláa lónsins. Auk þeirra tóku þeir: Kristinn Jónasson bæjarstjóri og Friðrik Friðriksson verkfræðingur hjá Hitaveitu Suðurnesja, þátt í pallborðsumræðum á eftir.

Í umræðunum var sjónum sérstaklega beint að Lýsuhóli, þar sem heitt ölkelduvatn streymir upp úr jörðinni. Voru frummælendur og fundarmenn sammála um að þar væru um margt einstæðir möguleikar á uppbyggingu fjölþættrar heilsulindar með áherslu á sérstöðu og heilsugildi ölkelduvatnsins. Til að svo mætti verða þyrfti nánari rannsóknir og boranir eftir heitu vatni og vekja þyrfti áhuga fjársterkra aðila á möguleikum fjölbreyttrar heilsulindar á Snæfellsnesi.  Heilsulindir sem nýta sér ölkelduvatn eru þekktar víða í Mið-Evrópu og hafa notið mikilla vinsælda í hundruð ára.

Reyndar voru uppi stórhuga áform um nýtingu ölkelduvatnsins á Snæfellsnesi fyrir um 100 árum, en ekkert varð úr þeim og útflutningur ölkelduvatns rann út í sandinn. Kannski er nú rétti tíminn runninn upp? 

Ferðamönnum fjölgar mjög ört á Snæfellsnesi og nefna má sem dæmi, að á Djúpalónssand einan koma um 60 þúsund manns á ári. Rekstrarmöguleikar heilsulinda að Lýsuhóli og víðar á Snæfellsnesi ættu því að vera góðir, sé horft til reynslunnar frá Bláa lóninu, Mývatnssveit og víðar.

10.11.2005

Þá er dagsskráin endanlega ákveðin þann 25.11 2005

13.10.2005

Nú er hafinn undirbúningur að 100 ára afmælishátíð Þórðar þann 25. nóv næstkomandi að Lýsuhóli. Dagskrá dagsins verður í stuttu máli að milli kl. 15.-18 verður haldið málþing um ölkeldur og heilsulindir með þekktum og óþekktum fyrirlesurum og pallborði á eftir. Um kvöldið verður svo haldið afmælishátíð með sögum, tómlist og myndbrotum. Nánar auglýst síðar.

Fleiri myndir komnar undir liðinn Myndir 

16.09.2005

30.07.2005

Þá hefur vefstjóri loksins tíma til að segja fréttir.

Á færeysku dögunum í Ólafsvík vöru hollvinir Þórðar mjög áberandi á markaðnum og á föstudagskvöldið var mikil stemming í Klifi þar sem ýmsir sagnamenn létu gamminn  geisa við góðar undirtektir gesta sem voru á annað hundrað. Myndir frá helginni koma von bráðar á vefinn.

Undir hnappnum Fróðleikur er komin liður sem fjallar um það sem er á döfinni.

Sæmundur hefur farið nokkrar ferðir á slóðir Þórðar og hér er frétt um þá síðustu.

Vel heppnuð kvöldferð um slóðir Þórðar

Þriðjudagskvöldið 26. júlí stóðu Hollvinasamtökin ásamt Þjóðgarðinum Snæfellsjökli fyrir vel heppnaðri kvöldferð um slóðir Þórðar. Hópurinn gekk hringleið úr Hólavogi að Gáluvík og um hraunið til baka. Leiðsögumaður í ferðinni var Sæmundur Kristjánsson og sagði hann frá refaveiðum Þórðar á svæðinu ásamt viðureignum hans við tröllskessur. Sögunum til staðfestingar voru skoðuð hlaðin skotbyrgi og steingerð tröll. Ferðin var afar vel heppnuð, vel á þriðja tug gesta mættu enda blíðskaparveður þetta kvöld.

Hluti hópsins, Snæfellsjökull í baksýn

17.05.2005

Þann 21.05 föstudag kl 20:00 verður farið upp á bekkinn svokallaðan í Ólafsvík  og lesin frásögn Þórðar´sem Loftur Guðmundsson skráði um sjóslysið sem Þórður lenti í veturinn 1954. Þaðan verður haldið í Pakkhúsið og sýnt myndband með Þórði. Hvetjum alla til að koma og hlýða á einstaka frásögn með útsýni yfir staðhætti og rifja upp kynni sín af Þórði eða kynnast honum í fyrsta sinn.

     Frásögnin er komin undir liðnum Fróðleikur.

04.04.2005

Á síðasta stjórnarfundi var ákveðið að bæta upplýsingaflæðið til félagsmanna og setja fundargerðir og félagatal hér inn á vefinn.

Krækjur á það eru undir liðnum fróðleikur hér til vinstri.

09.03.2005.

Þórði hefur borist eftirfarandi bréf . Hvet alla til að lesa það og senda Þórði póst á doddi@refaskytta.is eða smella á Hafa samband hér til hliðar.

Stofnun hollvinasamtaka Þórðar Halldórssonar frá Dagverðará

Þórður Halldórsson frá Dagverðará á Snæfellsnesi hefði orðið 100 ára 25. nóvember á þessu ári en hann lést árið 2003. Þórður var margbrotinn og fjölhæfur maður, þekktur meðal annars sem sjómaður, náttúruunnandi, refaskytta, listmálari, hagyrðingur, sagnamaður og heilsufrömuður.

Mikið efni er til eftir Þórð svo sem viðtalsbækur, kveðskapur og málverk.

Þórður var mjög áhugasamur um ölkelduvatn og hollustu þess en fyrstu árin ólst hann upp í Bjarnarfosskoti í Staðarsveit þar sem ölkeldur eru nokkrar í næsta nágrenni bæjarins. Hann bjó síðar á Dagverðará í Breiðuvíkurhreppi og kenndi sig æ síðan við þann bæ. Eftir að hann fluttist frá Snæfellsnesi gætti hann þess að eiga ávallt ölkelduvatn til drykkjar, sótti sér vatnið á kúta og baðaði sig í heita ölkelduvatninu í Lýsuhólslaug þegar færi gafst. Hann var sannfærður um að ölkelduvatn til drykkjar og baða héldi við hans góðu heilsu og atgervi.

Á 99 ára afmælisdegi hans, 25. nóvember síðastliðinn, kom saman hópur fólks til að ræða hugmyndir um að heiðra minningu hans með stofnun hollvinafélags sem hefði meðal annars að markmiði útgáfu minningarits og heimildakvikmyndar um Þórð, beitti sér fyrir kynningu og aukinni nýtingu á ölkelduvatni á Snæfellsnesi, þ.á.m. stofnun heilsubaða við Lýsuhólslaug.

Nú er komið að stofnfundi hollvinafélags Þórðar Halldórssonar en hann verður haldinn laugardaginn 5. mars nk. kl. 14:00 í Lýsuhólsskóla í Snæfellsbæ. Þar munu meðal annarra halda erindi Haukur Jóhannesson, jarðfræðingur, Kári Schram, kvikmyndagerðarmaður, Ívar Gissurarson, bókaútgefandi, og fulltrúi frá Orkuveitu Suðurnesja.

Allir áhugasamir um þau mál er hér hafa verið talin eru hvattir til að mæta og taka þátt í stofnun félagsins.

Skráningargjald í félagið er 1000 krónur.